உடன் அமுலுக்கு வரும் வகையில் மேல் மாகாணத்தில் உள்ளவர்களுக்கு பயணத்தடை

மேல்மாகாணத்தில் இருந்து வெளிச் செல்வதற்கு உடன் அமுலாகும் வகையில் தடை விதிக்கப்பட்டுள்ளதாக அறிவிக்கப்பட்டுள்ளது.

இராணுவத்தளபதி இதனை அறிவித்துள்ளார்.

கொவிட் தொற்று அதிகமாக காணப்படுகின்ற மேல் மாகாணத்திலிருந்து, ஏனைய வெளி மாகாணங்களுக்கு செல்வதை தவிர்க்கும் வகையில் செயற்படுமாறு ஜனாதிபதி கோட்டாபய ராஜபக்ஷ, உரிய தரப்பினருக்கு ஆலோசனை வழங்கியுள்ளார்.

கொவிட் தடுப்புக்கான செயலணிக்கும், ஜனாதிபதி கோட்டாபய ராஜபக்ஷவிற்கும் இடையில் இன்று இடம்பெற்ற சந்திப்பின் போதே அவர் இதனைக் குறிப்பிட்டுள்ளார்.

அத்துடன், தொற்றா நோய்களை எதிர்நோக்கியுள்ளவர்களை, கொவிட் தொற்றிலிருந்து பாதுகாத்துக்கொள்வதற்கான விசேட வேலைத்திட்டமொன்றை ஆரம்பிக்குமாறும் ஜனாதிபதி ஆலோசணை வழங்கியுள்ளார்.

ஏனைய நாடுகளை போன்றே இலங்கையிலும் தொற்றா நோய்களினால் பாதிக்கப்பட்டவர்களே 93 வீதமானோர் உயிரிழப்பதாகவும் அவர் சுட்டிக்காட்டியுள்ளார்.

மாரடைப்பு, நீரிழிவு, சிறுநீரக நோய் மற்றும் புற்றுநோய் உள்ளிட்ட தொற்றா நோய்களினால் பாதிக்கப்பட்டவர்களே, கொவிட் வைரஸ் தொற்றினால் அதிகளவில் உயிரிழப்பதை அவர் சுட்டிக்காட்டியுள்ளார்.

மேலும், பலர் எந்தவித கொவிட் அறிகுறிகளும் இன்றி உயிரிழப்பதாக கூறியுள்ள ஜனாதிபதி, பிரேத பரிசோதனைகளின் போதே அது உறுதிப்படுத்தப்படுவதாகவும் குறிப்பிட்டுள்ளார்.

இதேவேளை, மேல் மாகாணத்திலிருந்து வெளி மாகாணங்களுக்கு செல்வதற்கு எதிர்வரும் 15ஆம் திகதி வரை தடை விதிக்கப்பட்டுள்ளது.

இந்த தடையுத்தரவானது உடன் அமுலுக்கு வரும் வகையில் பிறப்பிக்கப்பட்டுள்ளதுடன், எதிர்வரும் 15ஆம் திகதி நள்ளிரவு 12 மணி வரை அமுலில் இருக்குமாறும் என இராணுவ தளபதி லெப்டினன் ஜெனரல் ஷவேந்திர சில்வா தெரிவிக்கின்றார்.