இம்ரான் கானின் உரை நிறுத்தப்பட்டமை வருத்தமான தீர்மானம் - ஹக்கீம் MP

இலங்கைக்கு எதிர்வரும் 22 ஆம் திகதியன்று விஜயம் செய்யவிருக்கும் பாகிஸ்தான் பிரதமர் இம்ரான் கான், பாராளுமன்றத்தில் உரையாற்றுவார் என முன்னர் அறிவிக்கப்பட்டது. எனினும், அந்த தீர்மானத்தை மறுபரிசீலனைக்கு உட்படுத்திய அரசாங்கம், உரையாற்றுவதற்கான வாய்ப்பை வழங்காதிருக்கத் தீர்மானித்துள்ளது.

அரசாங்கத்தின் இந்தத் தீர்மானம் தொடர்பில், பல்வேறு தரப்பினரும் கடுமையான விசனத்தைத் தெரிவித்துள்ளனர்.

இதுதொடர்பில் வெளிநாட்டு ஊடகமொன்றுக்குக் கருத்துரைத்துள்ள ஸ்ரீ லங்கா முஸ்லிம் காங்கிரஸின் தலைவரும் ஐக்கிய மக்கள் சக்தியின் பாராளுமன்ற உறுப்பினருமான ரவூப் ஹக்கீம், எங்கள் அரசாங்கம், முதலில் எங்கள் சொந்தப் பிரதமரைச் சங்கடப்படுத்தியது. இப்போது அவர்கள் எங்களிடம் வரும் மற்றொரு நாட்டின் பிரதமரைச் சங்கடப்படுத்துகிறார்கள். இது மிகவும் வருத்தமாக இருக்கிறது” எனத் தெரிவித்துள்ளார்.

இதேவேளை, தன்னுடைய டுவிட்டரில் பதிவொன்றை இட்டுள்ள, ஐக்கிய மக்கள் சக்தியின் பாராளுமன்ற உறுப்பினரான கலாநிதி ஹர்ஷ டி சில்வா, “ இலங்கைக்கு விஜயம் செய்யவிருக்கும் பாகிஸ்தான் பிரதமர் இம்ரான் கான், பாராளுமன்றத்தில் உரையாற்றுவதற்கான வாய்ப்பை வழங்காதிருப்பதற்கு எடுக்கப்பட்ட தீர்மானம், கட்சித் தலைவர்களின் கூட்டத்தில் எடுக்கப்பட்ட தீர்மானமாகும் என வெளியான தகவலை முழுமையாக மறுத்துள்ளார்” அவ்வாறான எந்தவொரு கூட்டத்திலும் ஐக்கிய மக்கள் சக்தி பங்கேற்கவில்லை எனத் தனது பதிவில் குறிப்பிட்டுள்ள அவர், பாராளுமன்றத்தில் மட்டும் உரையாற்ற மாட்டாரா? அல்லது அவருடைய முழு விஜயமும் இரத்துச் செய்யப்பட்டுள்ளதா? என வினவியுள்ளார்.

பாகிஸ்தான் பிரதமர், இலங்கை பாராளுமன்றத்தில் உரையாற்றுவதற்கான வாய்ப்பை வழங்காதிருப்பதற்கான தீர்மானம், இறுதித் தருணத்திலேயே எடுக்கப்பட்டுள்ளது. கொவிட்-19 நோய்க் கட்டுப்பாடுகள் கவனத்தில் கொள்ளப்பட்டே, மேற்கண்ட தீர்மானம் எட்டப்பட்டுள்ளது என அரசாங்கத்தின் உயர்மட்டத் தகவல்கள் வெளியாகியிருந்தன.

பாகிஸ்தான் பிரதமர் இம்ரான் கான், பெப்ரவரி 24ஆம் திகதியன்று பாராளுமன்றத்தில் உரையாற்றவிருந்தார். அவர் தனது விஜயத்தின் போது, ஜனாதிபதி, பிரதமர் உள்ளிட்ட தரப்பினருடன் இருதரப்புப் பேச்சுவார்த்தைகளில் ஈடுபடவிருந்தார். அத்துடன், வர்த்தகம், முதலீடு ஆகிய மாநாடுகளிலும் பங்கேற்கவிருந்தார்.

கடந்த ஆண்டு, கொவிட்-19 நோய்த் தொற்று வியாபித்ததை அடுத்து, இலங்கைக்கு விஜயம் செய்யும் முதலாவது வெளிநாட்டு அரச தலைவராக பாகிஸ்தான் பிரதமர் இம்ரான் கான் திகழ்வதுடன், பெப்ரவரி 23 ஆம் திகதி அவருடைய வருகை அமையவுள்ளது.

பாகிஸ்தான் பிரதமர் இலங்கை பாராளுமன்றத்தில் உரையாற்றுவது இன்னும் இறுதிசெய்யப்படவில்லை. அந்த விவகாரம் தொடர்பில் கலந்துரையாடப்படுகின்றது” என கொழும்பிலுள்ள பாகிஸ்தான் உயர்ஸ்தானிகராலயம் தெரிவித்துள்ளது.

இந்நிலையில், இலங்கைக்கு விஜயம் செய்யும் பாகிஸ்தான் பிரதமர் இம்ரான் கான், பாராளுமன்றத்தில் உரையாற்றுவார் அதுதொடர்பில் கட்சித் தலைவர்கள் கூட்டத்தில் தீர்மானிக்கப்பட்டுள்ளது என சபாநாயகர் மஹிந்த யாப்பா அபேவர்தன தெரிவித்துள்ளார்.
இதேவேளை, இந்தத் தீர்மானம் தொடர்பில், அன்றைய கட்சித் தலைவர்கள் கூட்டம் தொடர்பில் அறிக்கையில் பதியப்பட்டுள்ளதென பாராளுமன்றத் தகவல்கள் தெரிவிக்கின்றன.